Opinn fundur í Háskóla Íslands um jöklarannsóknir NASA og Caltech

Í tilefni af komu vísindamanna frá Bandarísku geimferðastofnuninni  NASA  og Caltech-háskóla í Kaliforníu hingað til lands til jöklarannsókna efna Háskóli Íslands og Sendiráð Bandaríkjanna á Íslandi til hádegisfundar í dag kl. 12.00–13.15 í Hátíðasal Háskóla Íslands.

Þar mun Helgi Björnsson, vísindamaður við Jarðvísindastofnun Háskólans, fjalla um mikilvægi alþjóðlegs samstarfs í jöklafræði og Mark Simons, prófessor í jarðeðlisfræði, og Brent Minchew, doktorsnemi í jarðeðlisfræði, báðir við Caltech-háskóla, ræða um samstarfsverkefni NASA, Caltech og Háskóla Íslands á þessu sviði.

Samstarfsverkefnið snýr að þróun nýrrar tækni til ratsjármælinga á hreyfingu jökla. Tæknibúnaðinn mætti einnig senda um allan heim í ómönnuðu flygildi til að mæla breytingar sem orðið hafa á yfirborði jarðar við náttúruhamfarir eins og eldgos, jarðskjálfta, skriðuföll og flóð. Frumgerð þessa búnaðar er nú um borð í rannsóknaflugvél NASA sem stödd er hér á landi ásamt vísindamönnum frá geimferðastofnunni og Caltech.

Á meðan á dvöl bandarísku vísindamannanna stendur hér á landi verður tækjabúnaðurinn nýttur til mælinga á hreyfingu jökla. Flogið verður yfir Langjökul og Hofsjökul með nokkurra klukkustunda millibili í nokkra daga og við það fæst samfelld mynd af hreyfingu jöklanna. Á sama tíma verður komið fyrir GPS-landmælingatækjum sem mæla mjög nákvæmlega færslur í stökum punktum á jöklunum.

Þessar flugmælingar, ásamt þeim grunngögnum sem Jöklahópur Jarðvísindastofnunar hefur á undanförnum árum aflað um botn, yfirborð, afkomu og hreyfingu jöklanna, verða notaðar til að auka þekkingu á eðliseiginleikum jökulíss og bæta reiknilíkön af flæði jökla. Samstarfshópur Caltech, NASA og Háskóla Íslands hefur áður mælt hreyfingu Langjökuls og Hofsjökuls snemma sumars og endurtekur nú mælingar um hávetur til þess að kanna hvaða áhrif leysingarvatn hefur á ísflæði.

Erindin á hádegisfyrirlestrinum í dag verða flutt á ensku.

Hægt verður að ná tali af bæði Helga Björnssyni, Mark Simons og Brent Minchew eftir fyrirlesturinn í hádeginu.