Vill að þingmenn séu með bindi í ræðustól

Forsætisnefnd Alþingis ákvað í byrjun síðasta kjörtímabils að þingmenn þyrftu ekki lengur að vera með bindi eða slifsi í þingsal eða ræðustól.

Breytingin var gerð í kjölfar athugasemda nokkurra þingmanna sem töldu að slíkt væri ekki lengur nauðsynlegt.

Einar K. Guðfinnsson, forseti Alþingis, segir að þetta hafi verið skref í ranga átt.

„Ég er íhaldssamur og hef orðið íhaldssamari með árunum að þessu leyti. Ég tel að þetta hafi verið vont skref. Ég tel að þetta sé hluti af ásýnd Alþingis sem ég hefði gjarnan viljað varðveita. Alþingi byggir sína vinnu frá degi til dags á lögum um þingsköp. Þar er sumt neglt niður og sumt klappað í stein. Annað byggir á hefðum sem menn hafa viðurkennt og virt. Ég held að það sé mjög mikilvægt að þingmenn geri það áfram. Að við þurfum ekki að skrifa það niður að karlar eigi að vera með bindi og konur snyrtilega klæddar. Það á að vera hluti af viðurkenndum viðmiðum,“ segir Einar.