Dregur verulega úr andstöðu við aðild að ESB

Andstaða við aðild Íslands að Evrópusambandinu hefur minnkað um tæplega 13 prósentustig á einu ári, en nú eru um 32 prósent landsmanna hlynnt aðild að sambandinu. Stuðningur við aðild er meiri hjá eldra fólki en yngra.

MMR kannaði afstöðu Íslendinga til aðildar að Evrópusambandinu í könnun sem gerð var dagana 9. til 15. janúar, en fyrirtækið gerði sams konar könnun í janúar 2013. Af þeim sem tóku afstöðu sögðust nú segjast 32,3% hlynnt því að Ísland gangi í Evrópusambandið borið saman við 25,0% í janúar 2013. Af þeim sem tóku afstöðu nú sögðust 50,0% vera andvíg því að Ísland gangi í Evrópusambandið, borið saman við 62,7% í janúar í fyrra og hefur því fækkað í hópi andstæðinga aðildar um tæp 13 prósentustig. Ekki var spurt um afstöðu fólks til þess að ljúka aðildarviðræðum, en eldri kannanir hafa sýnt að töluverður meirihluti Íslendinga vilji klára aðildarviðræðurnar.

Nokkur munur er á afstöðu fólks eftir aldri. Þannig er fólk á aldrinum 50 til 67 ára hlynntast því að ganga í Evrópusambandið eða tæp 42 prósent, en andstaðan við aðild er mest í hópi yngsta hópsins, 18 til 29 ára þar sem um 53 prósent eru andvíg aðild Íslands að Evrópusambandinu og elsta hópsins, yfir 68 ára, þar sem um 55 prósent aðspurðra eru andvíg aðild.

Það kemur ekki á óvart að kjósendur Samfylkingarinnar og Bjartrar framtíðar eru hlyntastir aðild íslands að Evrópusambandinu en 72,6 prósent kjósenda Sjálfstæðisflokksins og tæp 78 prósent kjósenda Framsóknarflokksins eru andvíg aðild. Þá skiptast kjósendur Pírata í tvo jafna hópa um 40 prósent kjósenda þeirra eru á móti aðild og um 42 prósent fylgjandi aðild að Evrópusambandinu.

Íbúar höfuðborgarsvæðisins voru frekar hlynntir inngöngu Íslands í ESB en þeir sem búsettir voru á landsbyggðinni.