Fjórir sigrar í röð hjá Herði Axel og félögum

Hörður Axel Vilhjálmsson og félagar hans í Mitteldeutscher BC eru á miklum skriði í þýsku 1. deildinni í körfubolta.

MBC tapaði í fyrstu umferð fyrir stórliði Bayern München, en vann í kvöld fjórða sigurinn í röð þegar liðið lagði Phoenix Hagen, 80-79, í spennuleik á heimavelli.

Gestirnir réðu lögum og lofum framan af og voru 43-29 yfir í hálfleik, en heimamenn sóttu í sig veðrið í þeim síðri og tryggðu sér sigurinn á vítalínunni á síðustu sekúndu leiksins.

Hörður Axel kom ekki mikið við sögu í kvöld. Hann spilaði rétt tæpar sjö mínútur án þess að skora stig eða taka frákast. Hann reyndi eitt tveggja stiga skot sem geigaði.

MBC er í toppbaráttunni í Bundesligunni með átta stig eftir fimm umferðir.