Snarræði slökkviliðsmanna bjargaði miklu

Hluti verksmiðjuhúsnæðis í Dugguvogi í Reykjavík er gerónýtt eftir mikinn bruna í húsnæðinu í hádeginu í dag. Slökkviliði tókst með snarræði að koma í veg fyrir að eldurinn breiddist út í aðra hluta hússins.

Fjölmargir tilkynntu um eldinn til slökkviliðs enda barst mikill reykur frá honum sem sást víða og þegar slökkvilið bar að garði voru rúður á annarri hæð í austurenda hússins sprungnar út vegna hitans.

Mikill eldur logaði á hæðinni í austurendanum og má ætla að hún sé gerónýt eftir brunann.

„Þeir sáu það strax þegar þeir (slökkviliðsmenn) voru að koma úr Árbænum að þetta var mikið. Þannig að við kölluðum út aukalið enda gríðamikill eldur og hiti,“ sagði Marteinn Geirsson deildarstjóri hjá Slökkviliði höfuðborgarsvæðisins sem stjórnaði aðgerðum

Jóhannes Tryggvason eigandi skiltagerðarinnar Dengsa var nýfarinn af efri hæðinni um klukkan tólf á hádegi.

„Ég fór í mat klukkan tólf. Síðan fékk ég símatal tuttugu mínútur yfir og sagt að húsið væri alelda,“ segir,“ segir Jóhannes.

Einn af starfsmönnum skiltagerðarinnar var á neðri hæðinni þegar eldurinn kom upp.

„Hann var í tölvu en þá fór netsambandið og hann labbaði upp og fékk bara mökkinn á móti sér og kom sér út,“ segir Jóhannaes.

Slökkviliði gekk vel að ráða niðurlögum mesta eldsins en hann blossaði annað slagið upp aftur og læsti sig einnig í þak hússins.

Slökkviliðsmenn rifu upp stóran hluta þaksins þar sem glæður leyndust og rauk úr, til að koma í veg fyrir að eldurinn læsti sig í austurenda hússins og tókst það. En eldur blossaði þó upp aftur í Vesturendanum af og til sem slökkviliðsmenn drápu jafn harðan.

Jóhannes segist vel tryggður og hann ætli að halda starfseminni áfram.

„Það slasaðist enginn og þetta er bara högg sem maður fær og tekur á því,“ segir Jóhannes. Það sé nóg að gera í skiltagerðinni, en fyrirtækið sér m.a. um stór auglýsingaskilti víðs vegar um höfuðborgarsvæðið.