Lögregla elti mann sem sinnti ekki stöðvunarmerkjum

Bílstjóri sem lögreglumenn í Austurborginni ætluðu stöðva um níu leytið í gærkvöldi sinnti ekki ekki stöðvunarmerkjum lögreglu og hófst þá eftirför þar sem ökumaðurinn ók allt of hratt og sinnti í engu umferðarmerkjum eða ljósum. Loks tókst að stöðva för mannsins á Bústaðavegi og er hann grunaður um akstur undir áhrifum og vörslu fíkniefna.

Maðurinn var handtekinn og færður á lögreglustöð þar sem hann gisti í nótt.

Um klukkan hálftíu þurfti lögreglan síðan að hafa afskipti af ölvuðum manni sem var að grýta hús í Miðborginni. Þegar lögreglumenn  bar að garði veittist maðurinn að þeim og þurfti því að handtaka hann og vista í fangageymslum. Hann á yfir höfði sér kæru fyrir brot á áfengislögum og lögreglusamþykkt fyrir Reykjavíkurborg.