Fyrsti Bifrestingurinn verður dómari

Guðfinnur Stefánsson er fyrsti dómarinn við íslenskan dómstól sem ekki er útskrifaður frá Háskóla Íslands. Guðfinnur gegnir embætti héraðsdómara við Héraðsdóm Reykjavíkur, en hann tók til starfa í febrúarbyrjun. Hann útskrifaðist með ML gráðu í lögfræði frá Bifröst árið 2008 en ári áður lauk hann námi í viðskiptalögfræði frá sama skóla.

Guðfinnur mun gegna embætti héraðsdómara tímabundið, frá 1. febrúar til 30. apríl.

Frá útskrift hefur hann starfað sem starfað sem aðstoðarmaður dómara, fyrst við Héraðsdóm Reykjavíkur og síðar við Héraðsdóm Veustrlands.

„Það er mikið ánægjuefni að lögfræðingur frá Háskólanum á Bifröst skuli ná þessum áfanga. Það var einmitt Háskólinn á Bifröst sem reið á vaðið og hóf að veita HÍ öfluga samkeppni í laganámi árið 2001. Frá árinu 2004 hefur skólinn jafnframt boðið upp á meistaranám ML í lögfræði og útskrifar nemendur með fullnaðarpróf í lögum. Við lítum á þessi tímamót sem staðfestingu á gæðum námsins sem hér er boðið upp á og vitnisburð um það öfluga starf sem unnið er á lögfræðisviði Háskólans", segir Helga Kristín Auðunsdóttir sviðsstjóri lögfræðisviðs Háskólans á Bifröst.