Framadagar háskólanna í dag

Í dag verða Framadagar háskólanna haldnir í 20. sinn. Það eru alþjóðlegu stúdentasamtökin AIESEC sem standa fyrir viðburðinum en þar gefst háskólanemum tækifæri til að ræða við forsvarsmenn margra helstu fyrirtækja og stofnana landsins um atvinnumöguleika og lokaverkefni.

Til að auglýsa viðburðinn hafa hin svokölluðu framadýr ferðast vítt og breitt um höfuðborgarsvæðið undanfarna daga og birt myndir af sér á Instagram. Um er að ræða aðstandendur Framadaga í gervi jakkafataklæddra meðlima dýraríkisins.

Framadagar háskólanna fara fram í Háskólanum í Reykjavík frá klukkan 11 til 16. Strætisvagn mun ferja gesti milli Háskóla Íslands og Háskólans í Reykjavík þeim að kostnaðarlausu hluta dags.