Stemmning í Sólinni

Fjölmargir lögðu leið sína í Sólina í Háskólanum í Reykjavík í dag þar sem hinir árlegu Framadagar voru haldnir. Sólin er heitið á miðrými aðalbyggingar HR.

Á sjötta tug fyrirtækja kynntu starfsemi sína fyrir háskólanemendum. Starfsmenn þeirra skelltu upp básum, dreifðu bæklingum og svöruðu spurningum áhugasamra háskólanema.

Þá fóru fjölmargir örfyrirlestrar fram í tilefni dagsins auk þess sem kennarar úr Háskólanum í Reykjavík og Háskóla Íslands, sem standa saman að viðburðinum, áttust við í spurningakeppni.

Stefán Karlsson, ljósmyndari Fréttablaðsins og Vísis, leit við í Sólinni og fangaði stemmninguna.