Lennon vildi friðarsúluna í garðinn sinn

Bítillinn John Lennon hreifst af hugmynd Yoko Ono um friðarsúluna sem vígð var í Viðey árið 2007. Fjallað er um málið á vef The Examiner.

Haft er eftir Ono að Lennon hafi verið einn af 200 sem fengu sendan til sín póstlista með verkum listakonunnar árið 1967. Í kjölfarið hafði Lennon samband og bauð henni í hádegisverð. Hann lýsti yfir hrifningu sinni á einu verkanna, Light House, sem þá var á frumstigi. Hann vildi að hún byggði friðarsúlu fyrir sig til að hafa í garðinum.

„Ég sagði honum að ég væri sannfærð um að einn daginn væri hægt að búa hana til en ég vissi ekki hvernig. Mér finnst ennþá merkilegt að hann hafi verið svona hrifinn af þessari hugmynd, og það fyrir 40 árum.“

Ono segist hafa tileinkað súluna Lennon vegna þess að þetta hafi verið fyrsta verk hennar sem hann hreifst af. „Þetta er mitt verk, tileinkað John, sem tjáir þakklæti mitt og ást mína á honum.“

Friðarsúlan í Viðey logar samfellt frá sólarlagi til miðnættis frá 9. október til 8. desember ár hvert, frá gamlársdegi til þrettánda, og í eina viku kringum jafndægur á vori.

Sýning Ono, Imagine Peace, stendur yfir í Bob Rauschenberg-galleríinu í borginni Fort Myers, Flórída. Á sýningunni má sjá ljósmyndir af súlunni og önnur tengd verk.