Fjölskyldufaðir fram á sextugsaldur en heitir í dag Anna

Í þættinum Ísland í dag á Stöð 2 verður rætt við Önnu Margréti Grétarsdóttur sem lifði sem fjölskyldufaðirinn Ágúst Már fram á sextugsaldur. Á yfirborðinu var líf Ágústs ekkert frábrugðið lífi venjulegs íslensks karlmanns.„Daglegt líf gekk sinn vanagang og maður reyndi að láta það ganga. Ég var svona tiltölulega ánægð með lífið og tilveruna, þannig lagað. Allavega út á við. Alltaf var hugurinn á yfirsnúningi útaf mínu sálarástandi.“

Fjölskyldufaðirinn átti sér lítið leyndamál. Þegar farið var út fyrir landsteinana voru kvenmannsföt reglulega tekin með og notuð í einrúmi í lok dags.

„Það kom fyrir að  maður var að fara eitthvert erlendis, á vegum fyrirtækis eða ráðuneytis, þá var alltaf eitthvað í einu horninu á töskunni eða sér lítil taska sem í var búningur. Hann var svo notaður inn á herbergi eftir erfiði dagsins með glas í hönd.“



Saga Önnu Margrétar verður sögð í Íslandi í dag klukkan 18:55 á Stöð 2 í kvöld í opinni dagskrá.