Dósum að andvirði hálfrar milljónar stolið

Lögreglan á Selfossi hefur til rannsóknar þjófnað á tómum drykkjarumbúðum úr söfnunargámi björgunarsveitarinnar Ingunnar sem er til húsa á Laugarvatni.

Bjarni Daníelsson, gjaldkeri björgunarsveitarinnar, segir að erfitt sé að meta það nákvæmlega hversu mikið magn dósa hafi verið í gámunum þar sem þær voru geymdar.

Andvirði þess sem tekið var sé þó að minnsta kosti 300 þúsund krónur en hann skýtur þó á að líklega sé andvirðið frekar um 500 þúsund krónur.

„Við höfum komið að fólki að taka þær dósir sem eru fyrir utan geymslugámana en sumir skilja dósirnar eftir fyrir þar. En í þetta skipti var farið inn í gámana og allt tekið,“ segir Bjarni.

„Við vorum að geyma dósirnar til mögru áranna ef svo má að orði komast,“ segir hann. Tjónið er tilfinnanlegt og það sé þeim nokkuð áfall að hafa lent í þessu. Um sé að ræða dágóða upphæð sem hefði gagnast sveitinni til erfiðra og kostnaðarsamra björgunarstarfa í þágu almennings.

Lögreglan biður alla þá sem vita eitthvað um dósahvarfið að hafa samband í síma 480-1010.