Yfirlýsing frá rektor Háskóla Íslands

Jón Baldvin Hannibalsson fær greidda hálfa milljón frá Háskóla Íslands í bætur, auk þess sem rektor hefur beðið hann afsökunar á að málsmeðferð varðandi ráðningu hans hafi verið ábótavant og bitnað á honum að ósekju. Fyrir vikið hefur Jón Baldvin fallið frá málshöfðun á hendur Háskóla Íslands.

Þetta kom fram í fréttatilkynningu vegna samkomulags sem hefur náðst á milli Jóns Baldvins og háskólans.

Nú hefur Kristín Ingólfsdóttir, rektor við Háskóla Íslands, sent frá sér yfirlýsingu varðandi málið.

„Í tilefni af yfirlýsingu Jóns Baldvins Hannibalssonar í fjölmiðlum í dag, staðfesti ég að samkomulag hefur tekist í deilu hans og Háskóla Íslands. Ég get jafnframt staðfest að í samkomulaginu felst að Háskóli Íslands greiði Jóni Baldvini 500.000 krónur sem heildargreiðslu fyrir kennslu og leiðbeiningu, sem hann reiknaði með við Háskóla Íslands skólaárið 2013-2014, án viðurkenningar á bótaskyldu. Markmið samkomulagsins var að ljúka málinu í sátt og án frekari eftirmála. Af þeim sökum tel ég ekki viðeigandi að tjá mig frekar um málið.“