Langan tíma tók að birta auglýsingu yfirkjörstjórnar Kópavogs

Kópavogsbær birti auglýsingu um samþykkta framboðslista til sveitarstjórnarkosninga níu dögum eftir að þeir voru samþykktir af yfirkjörstjórn Kópavogs.

Þegar Vísir hóf eftirgrennslan eftir auglýsingu frá Kópavogsbæ í morgun hafði engin auglýsing verið birt frá bænum þrátt fyrir fyrirmæli í lögum um sveitarstjórnarkosningar. Nú hefur Kópavogsbær birt auglýsingu um framboð. Auglýsingin birtist á vef Kópavogsbæjar eftir hádegi í dag, 20. maí.

Auglýsingin er samþykkt þann 11. maí af yfirkjörstjórn í Kópavogi. Hana skipa Snorri G. Tómasson formaður, Elfur Logadóttir og Una Björg Einarsdóttir.

Samkvæmt 32. gr. laga um kosningar til sveitarstjórna nr. 5/1998, segir að  „Þegar yfirkjörstjórn hefur úrskurðað framboðin gerir hún þau kunn almenningi með auglýsingu sem birt er á sama hátt og á hverjum stað er títt að birta opinberar auglýsingar.“

Sigríður Björg Tómasdóttir, upplýsingafulltrúi Kópavogs, sagði í samtali við Vísi að handvömm sín hafi ollið því að tilkynning birtist ekki strax. „Auglýsingin mun birtast í bæjarblöðunum Kópavogspóstinum 22. maí, og Kópavogsblaðinu 24. maí. Hér hefur verið auglýst í bæjarblöðum fyrir kosningar, og það verður líka gert núna. Þar að auki eru auglýsingarnar birtar á vef Kópavogsbæjar, sem gert var í dag.“