Vandinn er fremur í Noregi en hér á landi

Dæmi eru um að Tesla S-rafmagnsbílar taki ekki hleðslu í Noregi þegar hitastig fer undir frostmark. Þetta hefur Dagens Næringsliv (DN) fengið staðfest hjá umboðsaðilum Tesla þar.

Tesla S var í september söluhæsti bíllinn í Noregi, en þar í landi njóta rafmagnsbílar og hybrid-bílar töluverðra vinsælda. Þann mánuðinn var Tesla S með 5,1 prósent heildarsölunnar, 616 af 12.168 bílum.

„Verkfræðingar okkar hafa haft samband við þá viðskiptavini sem málið snertir og tæknifólk okkar er að greina gögn og framkvæma prófanir í Noregi,“ hefur DN eftir Esben Pedersen, upplýsingafulltrúa Tesla Motors á Norðurlöndum. Hann segir vandamálið einskorðast við Noreg þar sem norska straumnetið sé ekki jarðtengt.

„Það hafa nokkrir viðskiptavinir lent í þessu, en ekkert bendir til þess að um stórvandamál sé að ræða,“ segir Pedersen og kveður enn verið að leita lausnar á málinu.

Gísli Gíslason, sem fer með söluumboð Tesla-bíla á Íslandi, segist hafa haft auga með vandkvæðum Norðmanna.

„Kerfið hjá þeim er aðeins öðru vísi og hægt að leysa málið með sérstökum græjum, sem við höfum til öryggis pantað til að eiga hér. Annars búum við svo vel hér á Íslandi að það er þriggja fasa rafmagn í nánast öllum húsum,“ segir hann. Þannig fullhlaði hann sinn bíl í frosti á átta tímum. Og með lítilli hraðhleðslugræju geti sá tími farið niður í fjóra tíma.

„Við vitum hins vegar um nokkur hús hér sem eru með þessu gamla kerfi, en 70 prósent eru með 380 volta kerfi.“

Þar að auki segir hann veður óvíða henta rafmagnsbílum jafn vel og hér, þar sem hvorki verði of heitt og sjaldnast of kalt, tíu gráða frost og þar fyrir neðan. „Núna eru þrettán bílar komnir á númer og þrátt fyrir miklar væntingar segja allir upplifunina af bílnum betri en búist var við.“

Drægi rafmagnsbíla í verstu aðstæðum

Þýska bílablaðið Auto Bild kannaði nýverið drægi rafmagnsbíla í frosti í Ölpunum. Munaði nálægt helmingi á getu þeirra og uppgefnu drægi. Renault Zoe var tómur eftir 59 kílómetra, Mitsubishi i-Miev og BMW i3 komust 61 kílómetra og Nissan Leaf 69 kílómetra. Þeir eru sagðir komast 100 til 200 kílómetra á hleðslu. Lengst komst Tesla S, 207 kílómetra, en uppgefið drægi er 480 kílómetrar.

„Þeir voru náttúrlega að fara upp allan tímann,“ segir Gísli Gíslason, sem í september ók Tesla S í striklotu frá Reykjavík til Akureyrar með skriðstillinn stilltan á 90 kílómetra hraða þar sem mátti. „Og á Akureyri voru 22 kílómetrar eftir á hleðslunni.“