Íslendingar í Noregi: "Þetta var rosalegt ástand. Fólk öskrandi og flautandi“

Slökkviliðsmenn hafa barist við eldana með sjálfboðaliðum en ráða illa við aðstæður. Um 30 hús hafa brunnið til kaldra kola en gamli bærinn, sem er á heimsminjaskrá UNESCO, virðist hafa sloppið. Hundruð manna þurftu að yfirgefa heimili sín.

Símasamband hefur legið niðri og því ekki hægt að ná í Íslendinga sem búa í bænum en samkvæmt heimildum okkar eru þeir óhultir. Íbúi í næsta bæ segir ástandið eins og á stríðssvæði.

„Eins og er fá íbúar ekki leyfi til að komast inn og skoða skemmdirnar vegna hættu á sprengingum frá gaskútum og öðru. Það er allt lokað í Lærdal,“ segir Jóhann Traustason sem býr í Efri Árdal, skammt frá Lærdal.

Hann segir ástandið skelfilegt. „Það eru margir ennþá á sjúkrahúsum út af reykeitrun, þetta er bara hræðilegt.“

Heiða Arsenault, sem einnig býr í Árdal, tekur undir. „Þetta var rosalegt ástand. Fólk öskrandi og flautandi í bílum að reyna að koma sér í burtu. Fólk sá ekkert fyrir reyk og svo bara enduðu allir á sjúkrahúsinu til að fá súrefni,“ segir Heiða.

Móðir sambýlismanns hennar býr í Lærdal og þegar hann fór að sækja móður sína var hann fenginn til slökkviliðsstarfa og var við þau í alla nótt. „Þeir voru bara á fullu að slökkva elda og reyna að hjálpa til. Bæjarbúar eru voðalega ósjálfbjarga því þeir hafa svo lítið vatn.“

Nóttin var löng hjá Heiðu og á meðan maður hennar barðist við eldana hlustaði hún á tengdamóður sína í gegnum síma, biðja fyrir húsi sínu. Það bjargaðist með ótrúlegum hætti og í meðfylgjandi myndskeiði má sjá hvernig húsin allt í kringum það loguðu um fimmleytið í nótt. „Við erum á leiðinni til Lærdal á eftir og þá munum við sjá ástandið. Ég á ekki von á fallegri sjón, eins og þetta er fallegur bær... eða, var fallegur bær.“