Hverjir kusu gegn sannfæringu sinni?

Katrín Júlíusdóttir þingmaður Samfylkingarinnar og fyrrverandi ráðherra, hefur sent forsætisnefnd erindi þar sem hún fer fram á að ávirðingar, sem hún kallar svo, í greinargerð með tillögu til þingsályktunar um að draga til baka umsókn Íslands um aðild að Evrópusambandinu osfrv. á þingskjali 635 - 340. mál. -- sem er þingsályktunartillaga Gunnars Braga Sveinssonar utanríkisráðherra um slit á aðildarviðræðum, verði rannsakaðar sérstaklega.

Katrín tilkynnti um þetta erindi sitt á Facebooksíðu sinni nú rétt í þessu:

„Undirrituð fer þess á leit við forsætisnefnd að hún fari fram á skýringu ríkisstjórnar á eftirfarandi fullyrðingu í greinargerð með ofangreindri þingsályktun: "Miðað við það sem fram hefur komið í atkvæðaskýringum, yfirlýsingum þingmanna og fleiri gögnum má jafnvel leiða að því rök að ekki hafi í raun verið til staðar meirihlutavilji fyrir málinu heldur hafi þetta verið hluti af pólitísku samkomulagi þáverandi stjórnarflokka við myndun ríkisstjórnar og atkvæðagreiðslan því tæplega lýsandi fyrir afstöðu þingmanna.“

Katrín segir að staðreyndin sé sú að þingmenn kusu einmitt þvert á flokkslínur í málinu eins og sjá má hér.

Og hún heldur áfram: „En látum þá staðreynd liggja milli hluta. Það alvarlega er að í þessari fullyrðingu er ríkisstjórnin að fullyrða að einhverjir þingmenn hafi ekki greitt atkvæði samkvæmt sannfæringu sinni og þar með brotið stjórnarskrá.

Undirrituð tók þátt í þessari atkvæðagreiðslu og var hluti stjórnarmeirihlutans á þessum tíma. Ég vil í ljósi þess fara fram á það að forsætisnefnd kalli eftir upplýsingum þeim sem liggja til grundvallar ofangreindri fullyrðingu og gefi þinginu yfirlýsingu að athugun lokinni á því hvort og þá hverjir ekki greiddu atkvæði sannfæringu sinni samkvæmt. Þangað til liggja allir þingmenn sem þátt tóku í umræddri atkvæðagreiðslu undir ávirðingum um stjórnarskrárbrot þar á meðal undirrituð."

Og undir þetta ritar Katrín Júlíusdóttir 11 þingmaður Suðvesturkjördæmis.