„Ég er samt ekkert hlynntur svona janúaræði”

Bókin 30 dagar - leið til betri lífsstíls er skrifuð af næringar- og lífsstílsþjálfaranum Davíð Kristinssyni en hann hefur verið starfandi einkaþjálfari um árabil. Bókin er ætluð öllum þeim sem langar til að hreinsa til í mataræðinu og byggja upp heilbrigðan lífsstíl.

„Í bókinni eru 150 uppskriftir og matseðill fyrir níutíu daga. Í henni er einnig að finna myndrænt æfingakerfi með leiðbeiningum. Æfingarnar eru miðaðar við að fólk geti stundað þær hvort sem það kýs að æfa sig heima eða á líkamsræktarstöð.“

Davíð segir bókina ekki vera hefðbundna megrunarbók, markmiðið með henni er að gefa fólki tækifæri til þess að læra inn á sjálft sig og eigin líkama því það er lykillinn að heilbrigði.

„Á þessum þrjátíu dögum er takmarkið að átta sig á því hvaða mataræði og hvaða æfingar henta manni og hvað ekki, því það er ekki til nein ein lausn sem virkar fyrir alla. Fólk sem fylgir prógramminu léttist venjulega en ég vil meina að það besta við þessa leið sé að hún stuðli að því að fólk komist sem næst sinni persónulegu kjörþyngd.“

Davíð segir bókina alls ekki bjóða uppá töfralausnir enda er hann ekki hrifinn af þeim.

„Auðvitað dúkkar árlega upp svokallað megrunaræði á þessum árstíma. Ég er samt ekkert hlynntur svona janúaræði þegar fólk til dæmis kaupir sér þriggja mánaða líkamsræktarkort, ætlar að svelta sig eða borða hollt í eina viku en gefst svo upp. Það er alls ekki hollt fyrir líkamann og virkar ekki til langs tíma.“