Ekki enn verið talin púkó

Ásdís María Viðarsdóttir söngkona skartaði sérstakri andlitsmálningu í undankeppni Eurovision-keppninnar um síðustu helgi.

„Ég fékk Elísabetu Ormslev, vinkonu mína, til liðs við mig til að sjá um förðunina. Mér finnst mjög mikilvægt að vera öðruvísi en ég er í daglega lífinu þegar ég syng. Ég er stundum dálítið skrýtin venjulega þannig að ég þarf því að vera mjög, mjög skrítin þegar ég syng,“ segir Ásdís og skellihlær. „Við Elísabet skoðuðum förðun á netinu og blönduðum saman alls kyns hönnun ásamt eigin hugmyndum, teiknuðum svo útkomuna á blað og svo beint á andlitið á mér.“ Hún hlær þegar hún er spurð hvort hún hafi komið af stað tískubylgju með andlitsmálningunni. „Ég er alveg til í að þannig bylgja fari af stað og ég ætla að fá einkaleyfi á hana á meðan ég get.“

Hárskraut vinsælt

Hárskraut Ásdísar sem hún var með í keppninni vakti líka athygli. Það var fimmtán sentimetra löng keðja sem var búið að hanna á sérstakan hátt. „Gréta Þorkelsdóttir, vinkona mín, bjó hárkeðjuna til eftir hugmynd minni og systur minnar, Önnu Sóleyjar. Gréta hafði aldrei gert svona áður þannig að það voru undur og stórmerki að keðjan skyldi heppnast svona vel en hún er alveg hrikalega klár og fær í höndunum.“ Ásdís vinnur í Spúútnik og segir að undanfarið hafi mikið verið spurt um alls kyns hárbönd og -skraut. „Þetta er alveg rosalega vinsælt núna og verður örugglega eitthvað áfram.“

Ekki alheilagur tískugúrú

Ásdís kaupir flest fötin sín í Spúútnik eða í öðrum „second-hand“-búðum. „Ég er með fjölbreyttan stíl en ég er ekkert endilega að fara ótroðnar slóðir allan daginn. Ég er enginn alheilagur tískugúrú og er ekki góð í að fylgjast með tískublöðum og veit ekki hvað módel heita. Ég hef þó ekki lent í því ennþá, held ég, að vera púkó,“ segir hún. 

Leitar að fólki í „soul“

Aðspurð um Eurovision segist hún hafa viljað gera þetta einu sinni, gera þetta öðruvísi og „get out“. „Ég býst ekki við því að verða standard-Eurovision-kona. Mig langar að syngja „soul“-tónlist og er alltaf að leita að fólki til að gera alvöru „soul“ með mér. Það hefur lítið verið gert af þess konar tónlist hér á landi.“