BHM hafnar ASÍ samningunum á fjölmennum fundi

Kjarasamningar á almennum markaði eru ekki grundvöllur samninga háskólamenntaðara starfsmanna hjá hinu opinbera að mati formanns BHM. Tryggja þarf sambærileg kjör og í nágrannalöndum og snúa við flótta háskólamenntaðs fólks úr landi.

Kjarasamningum á almennum markaði í desember sem um helmingur félagsmanna ASÍ felldi var ætlað að stuðla að lækkun verðlags og stöðugleika í efnahagsmálum. Það er algerlega óvíst hvort þær forsendur  náist því ósamið er m.a. við framhaldsskólakennara og félagsmenn BHM sem boðaði til fjöldafundar  í Háskólabíói í dag og sætta sig ekki við hækkanir sem samið var um á almennum markaði.

Um níu hundruð manns sóttu fundinn í Háskólabíói sem einnig var sendur út til félagsmanna um allt land á netinu, en semja þarf fyrir hönd um átta þúsund félagsmanna. Formaður félagsins segir kröfuna einfalda; semja þurfi um afgerandi launaleiðréttingu.

„Að baki er langt tímabil stöðnunar í launum háskólamenntaðra. Störf okkar fólks hafa verið verðfelld og það þarf að leiðrétta. Undanfarin ár hafa verið tími þolinmæði, ábyrgðar og úthalds. Þar er ég ekki að segja ykkur neinar fréttir,“ sagði Guðlaug Kristjánsdóttir formaður BHM í ávarpi sínu til fundarmanna.

Formaðurinn kynnti til sögunnar formenn einstakra aðildarfélaga BHM en félögin semja öll sameiginlega að þessu sinni. Borin var upp ályktun sem samþykkt var einróma með standandi lófaklappi og formaðurinn segir að keyrt verði á að ná fram meiri hækkunum en eru í ASÍ samningunum.

Nú hafa forsendur þeirra samninga sagðar vera að stuðla að lækkun verðlags og auknum kaupmætti. Þið kaupið ekki þau rök?

„Markmiðið er gott. Staðan er hins vegar sú að það að hreyfa hægt og lítið laun háskólamenntaðara á Íslandi er bara leið til fortíðar. Við getum ekki unað við það. Við getum ekki fest í sessi neyðarástand síðustu ára,“ segir Guðlaug.

Frá hruni hafi áherslan verið lögð á lægstu launin og millistéttin setið eftir.

„Þar með höfum við verið að verðfella störf háskólamenntaðra og við drögumst aftur úr í samkeppni um þetta vinnuafl á alþjóðlegum vinnumarkaði og við þurfum að laga þetta,“ segir Guðlaug.

Mikill hugur var í fundarmönnum. Rúna Stína Ásgrímsdóttir sagðist vilja melta boðskap formannsins. „En það er alveg ljóst að við þurfum eitthvað að gera í þessum kjaramálum hjá okkur,“ sagði hún.

Guðmundur Guðjónsson félagi í BHM segist tilbúinn í verkfall til að þrýsta á um betri laun.

„En ekki endilega betri laun heldur til að ná betri kjörum og fá aðeins til baka af því sem við höfum lækkað núna undanfarið,“ sagði Guðmundur.