Vaka sigurvegari í Stúdentaráðskosningum

Vaka, félag lýðræðissinnaðra stúdenta, bar sigurorð af Röskvu, samtökum félagshyggjusinnaðra stúdenta, í kosningum til stúdentaráðs Háskóla Íslands í ár. Niðurstöður kosninganna voru tilkynntar fyrr í kvöld og hlaut Vaka 19 sæti af þeim 27 sem í boði eru.

„Við erum bara í skýjunum með þetta,“ segir Nanna Elísa Jakobsdóttir, varaformaður Vöku. „Við áttum ekki von á svona úrslitum og við erum mjög þakklát fyrir traustið.“

Vaka hefur átt meirihluta í Stúdentaráði nær óslitið síðustu ár og vann stórsigur í fyrra, þegar Röskva fékk aðeins sex frambjóðendur kjörna í ráðið. Þrátt fyrir það segir Nanna Vökuliða hafa verið hæfilega bjartsýna í ár.

„Það er aldrei nein leið að segja til um það hvernig gekk,“ segir Nanna. „Okkur finnst við hafa staðið okkur vel síðasta árið og buðum fram flott fólk. Þannig okkur finnst við eiga þetta skilið.“

Nanna segir að frambjóðendur muni fagna fram eftir kvöldi og svo taki við kærkomin hvíld eftir harða og spennandi kosningabaráttu.

„Það er samt þannig þegar starfið er svona skemmtilegt að maður þarf eiginlega ekkert að hvíla sig,“ segir Nanna.