Átakanlegar háhyrningamyndir frá Sædýrasafninu

CNN fjallaði fyrir helgi um háhyrningaveiðar og segir sögu Jeff Fosters sem áratugum saman fékkst við að fanga háhyrninga, meðal annars við Íslandsstrendur.

Í umfjölluninni birtast áður óséðar myndir, úr fórum Fosters, frá Sædýrasafninu í Hafnarfirði. En, þangað var farið með háhyrninga eftir að þeir höfðu verið veiddir á Íslandsmiðum á 9. áratug síðustu aldar, þar voru þeir þjálfaðir áður en þeir voru seldir fyrir stórfé til Sea World og fleiri slíkra staða. Þetta var umfangsmikil starfsemi, mjög arðvænleg og stóðu þessar veiðar lengi vel undir rekstri safnsins.

Hægt er að horfa á umfjöllun CNN neðst í fréttinni.

Jeff Foster stjórnaði veiðunum en hann hefur á síðari árum breytt afstöðu sinni, og vill nú vinna að því að sleppa háhyrningum úr prísundum sínum og út í náttúruna. Nú er viðurkennt að háhyrningar eru mjög háðir fjölskyldutengslum og tíst þeirra er nú túlkað sem vein, ákall til fjölskyldunnar. 

Myndunum frá Íslandi er lýst sem átakanlegum og sláandi. Víst er að afstaða til háhyrningaveiða hefur orðið verulega neikvæð með árunum, ekki síst úti í Bandaríkjunum.

Einhvern tíma hefðu þessar myndir þótt til marks um framtak og dugnað en nú þykir þetta fyrst og fremst átakanlegt. Sé horft til umfjöllunar CNN.

Í umfjölluninni greinir Foster frá því að honum hafi boðist fúlgur fjár fyrir að stjórna veiðum á átta háhyrningum við Rússland, af rússneskum aðilum, og annast þjálfun þeirra í framhaldinu. En, hann hafnaði því tilboði, sem hefði gert hann að milljarðamæringi – hann getur ekki staðið í þessu lengur.

Í umfjölluninni er greint frá því að háhyrningarnir sem fangaðir voru á Íslandsmiðum á sínum tíma hafi fengið íslensk nöfn, en þeim var svo breytt þegar þeir voru seldir til sýninga víðsvegar um heim. Foster segist þannig ekki vita hvort einhverjir þeirra sem hann fangaði á sínum tíma séu enn í sjávardýragörðum. 

Einn háhyrningur fékk þó að halda sínu íslenska nafni, Guðrún, sem veidd var 1976. Guðrún drapst með ömurlegum hætti í SeaWorld í Orlando í kjölfar þess að bera kálf. Það gekk erfiðlega og var kálfurinn dreginn út með trossum. Guðrún drapst fjórum dögum síðar.

Vísir hefur áður greint frá örlögum drápsháhyrningsins Tilikum sem einmitt var veiddur við Ísland og var í Sædýrasafninu fyrstu ár sín í haldi. Var meðal annars rætt við þjálfara hans Sigfús Halldórsson, en Tilikum reyndi að rífa hann til sín.