Kim Andersson að komast aftur af stað

Vonast er til þess að sænska stórskyttan Kim Anderson snúi fljótlega aftur á völlinn með liði sínu, KIF Kolding København, eftir langvarandi meiðsli.

Anderson hefur verið frá vegna meiðsla í öxl síðan í byrjun síðasta tímabils, en Aron Kristjánsson, þjálfari Kolding, segir að það styttist í endurkomu hans.

„Kim Andersson hefur verið lengi frá og þegar maður byrjar að spila handbolta á ný eftir langt hlé þá tekur tíma að koma til baka," sagði Aron.

„Hann spilaði tvo æfingaleiki um helgina í Þýskalandi, en þurfti svo að hvíla vegna meiðsla í hásin,“ sagði Aron sem býst við að Andersson spili á næstu leiktíð, en hann þorir ekki að segja hversu mikið.

Kolding hefur leik í dönsku úrvalsdeildinni gegn Bjerringbro-Silkeborg 30. ágúst.