Sakar lögregluna um upplýsingaleka

Hæstaréttarlögmaðurinn Vilhjálmur H. Vilhjálmsson var gestafyrirlesari í kennslustund í refsirétti við lagadeild Háskóla Íslands í gær. Þegar talið barst að upplýsingaflæði til verjenda í sakamálum vandaði Vilhjálmur lögregluembættinu ekki kveðjurnar.

Sakaði lögmaðurinn lögregluna um að leka mikilvægum upplýsingum til fjölmiðla sem hann taldi oft vita meira en sjálfir aðilar málsins. Í samtali við fréttamann Vísis gekkst Vihjálmur við þessum ásökunum og bætti við: „Lögreglan lekur öllum þeim upplýsingum sem henni hentar, þegar henni hentar."

Máli sínu til stuðnings reifaði Vilhjálmur sögu af því þegar honum var sagt að mæta í fyrirtöku í Héraðsdómi Reykjavíkur. Þegar þangað var komið sást hvorki tangur né tetur af skjólstæðingi hans enda var svo komið að fyrirtakan var í Héraðsdómi Reykjaness, ekki Reykjavíkur. Þegar Vilhjálmur var þangað kominn voru fjölmiðlamenn farnir að safnast saman.

„Stefán Logi var allur kramúbleraður og handleggsbrotinn og lögreglan hefur sent fréttamenn á staðinn til þess að ná myndum af honum í þessu ástandi til að láta hann líta illa út,“ sagði Vilhjálmur. Einnig sakaði Vilhjálmur lögregluna um að leyna hann upplýsingum um hvaða fíkniefni voru í fórum skjólstæðings hans. „Upplýsingarnar fékk ég svo í hádegisfréttum á Bylgjunni þar sem allt var látið flakka," sagði Vilhjálmur íbygginn að lokum.



Þetta er ekki í fyrsta sinn sem Vilhjálmur gagnrýnir upplýsingaleka lögreglunar en Vísir greindi frá máli sem hann hyggst höfða gagnvart aðstandendum vefsíðu sem birtu rannsóknargögn í máli hans.