Einstakar fálkamyndir E.Ól.

Einar Ólason ljósmyndari náði einstökum myndum af fálka sem var að gæða sér á svartfugli.

„Þetta var mjög sérstakt. Þetta var í byrjun janúar, í Hólastekk þar sem ég bý, tilheyrir Breiðholtinu. Ég er að elda „bröns“ (dögurð) handa mér og kærustunni á sunnudagsmorgni. Og henni var litið út um gluggann og spyr; hvaða fugl er þetta Einar? Þarna úti á götu, með annan fugl í kjaftinum? Ég rauk til, sá að þetta var fálki og fór út þó það væri dimmt og ekki góð skilyrði fyrir myndatöku. En ég náði þarna skemmtilegum myndum af fuglinum þar sem hann var að gæða sér á svartbak,“ segir Einar.

Hann segir svo frá að skömmu síðar komu fjórir hrafnar á vettvang og hröktu fálkann í burtu. Þrír þeirra flugu við svo búið á braut en einn þeirra varð eftir og gerði sér svartbakinn, sem Einar telur víst að fálkinn hafi veitt sér til matar, neyddist til að skilja eftir. Einar, sem er einn af okkar elstu og virtustu (blaða)ljósmyndurum, og merkti myndir sínar ávallt E.Ól., segist ekki hafa verið mikið í að mynda fugla. „En, ég er mikill fuglaáhugamaður.“

Einar segir lífið leika við sig, hann sé bullandi hamingjusamur enda var hann að opna sýningu síðastliðinn laugardag. „Í Art 67, Laugavegi 67. Þetta er önnur einkasýningin. Ég var með sýningu í ráðhúsinu í janúar í fyrra. Þetta eru 18 myndir. Í sama stíl og ég var með í fyrra; lítil smáatriði í náttúrunni sem flestir sjá ekki þegar þeir eru að ferðast um landið.“

En, lesendur Vísis geta virt fyrir sér myndirnar sem Einar náði af fálkanum, bara beint fyrir utan heimili sitt.