Skítafýlu lagði yfir Gljúfrastein

Dreifing minkaskíts í landi Hraðastaða og víðar í Mosfellsdal hafði í för með sér slíka lyktarmengun að íbúar í nágrenninu, þar á meðal Guðný Halldórsdóttir í Melkoti, kvörtuðu í lok október til bæjaryfirvalda.

Sögðu íbúarnir ólyktina jafnvel hafa borist yfir Gljúfrastein, hús Halldórs Laxness, sem er fjölsóttur ferðamannastaður og fyrrum heimili Guðnýjar. „Það hefur verið vandræðalegt fyrir starfsfólk safnsins að þurfa að útskýra fyrir gestum hvernig á henni stendur,“ sagði í bréfinu um ólyktina.

Heilbrigðiseftirlitið stöðvaði skítadreifinguna enda var þá komið fram yfir það tímabil sem jafnan er leyft að dreifa skít, 15. mars til 1. nóvember. Eftirlitið segir gert ráð fyrir að heimilt verði að dreifa skít frá búinu í landi Hraðastaða, þó skuli taka tillit til vindáttar og fjarlægðar við mannabústaði.

Guðný segir nú að ástandið hafi lagast og málinu sé lokið af hennar hálfu.