Nýr framkvæmdastjóri Sjálfstæðisflokksins

Þórður Þórarinsson, stjórnmálafræðingur, hefur verið ráðinn nýr framkvæmdastjóri Sjálfstæðisflokksins.

Hann tekur við af Jónmundi Guðmarssyni, en eins og Vísir greindi frá, þá hætti hann eftir fimm ára starf sem framkvæmdastjóri.

Þórður hefur undanfarin níu ár verið framkvæmdastjóri Vestnorræna ráðsins en það er samstarfsvettvangur Alþingis, Landsþings Grænlands og Lögþings Færeyja. Hann hefur komið víða við sögu Sjálfstæðisflokksins en hann sat í stjórn Heimdallar í fjögur ár, þar af eitt ár sem formaður. Auk þess sat hann í stjórn Sambands ungra sjálfstæðismanna.

Þórður er fæddur árið 1967 og er kvæntur Mörtu Maríu Ástbjörnsdóttur, sálfræðingi. Saman eiga þau þrjá syni.