Skoða áhrif fiskroðs gegn öramyndun

Samstarfssamningur íslenska lækningavörufyrirtækisins Kerecis ehf. og Landspítalans um klínískar rannsóknir var undirritaður í gær. Rannsakað verður hvort meðhöndlun með fiskroði dragi úr öramyndun.

Kerecis, sem á síðasta ári fékk markaðsleyfi fyrir lækningavörur bæði í Evrópu og Bandaríkjunum, hóf nýverið sölu á fyrsta MariGen Omega3-stoðefninu sem er roð úr íslenskum þorski.

Um er að ræða vöru sem ætluð er til meðhöndlunar á þrálátum sárum. Stoðefnið er búið til með því að fjarlægja frumur og ofnæmisvaldandi efni úr roðinu. Eftir stendur stoðgrind úr millifrumuefni. Stoðefni úr roði og mannshúð eru eins að uppistöðu til, meginmismunurinn liggur í Omega3-fitusýrum sem ekki finnast í vef spendýra, að því er segir í fréttatilkynningu frá samstarfsaðilunum.

Þegar MariGen Omega3-stoðefnið er lagt við skaddaðan vef nýtist efnið sem stoðgrind fyrir frumur líkamans auk þess að draga úr styrk niðurbrotsensíma. Frumur líkamans leita inn í efnið, skipta sér og ef aðstæður eru réttar skilja þær eftir endurskapaða húð.

Í fréttatilkynningunni er haft eftir Páli Matthíassyni, forstjóra Landspítalans, að með því að opna dyr fyrir prófunum á efninum verði vonandi flýtt fyrir því að til verði tækni sem leyst geti ýmis vandamál sem fylgja þeim ígræðsluefnum sem eru á markaði nú.