Innflutningsbann Rússa hefur áhrif á íslenskan hlutabréfamarkað

Talsverður órói var á hlutabréfamörkuðum víða um heim fyrir helgi vegna innflutningsbanns Rússa gagnvart þeim þjóðum sem framarlega hafa staðið í þvingunaraðgerð gegn landinu. Eins og fram hefur komið eru Íslendingar ekki meðal þjóða á bannlista Rússa en þó höfðu fréttir af banninu áhrif á hlutabréfamarkaðinn hérlendis.

Í morgunpósti IFS greiningar í morgun kemur fram að OMXI8 vísitalan lækkaði um 0,7 prósent á föstudag og sjö félög á aðallista lækkuðu í verði. Þar kemur einnig fram að hlutabréf í Marel lækkuðu í verði um tæplega þrjú prósent frá miðvikudegi til föstudags en fréttir hafa borist af því að kjúklingaiðnaðurinn verði illa úti vegna aðgerða Rússa. Sala til kjúklingaiðnarins nemur yfir helmingi tekna Marels og rekstrarhagnaður (EBIT) af þeirri starfsemi er hærri en rekstrarhagnaður félagsins í heild sinni.