Mögnuð stemning eftir að Löwen komst áfram | Myndband

Leikmenn Rhein-Neckar Löwen fögnuðu sigrinum á pólska liðinu Kielce vel og innilega á heimavelli sínum í gær.

Löwen tryggði sér sæti í 8-liða úrslitum Meistaradeildar Evrópu með fjögurra marka sigri, 27-23. Kielce vann fyrri leikinn á heimavelli með sama mun en ljón Guðmundar Guðmundssonar komust áfram á útivallamarkareglunni.

Niklas Landin átti stórleik í marki Löwen og þeir Alexander Petersson og Stefán Rafn Sigurmannsson voru sömuleiðis afar öflugir. Eins og sést á meðfylgjandi myndbandi fögnuðu leikmenn Löwen með stuðningsmönnum liðsins eftir leik.

Sigurinn var ekki síður sætur fyrir Guðmund sem hafði verið mikið í fréttum fyrir leikinn eftir að Talant Dujshebaev, þjálfari Kielce, veittist að honum eftir fyrri leik liðanna í Póllandi.

Dujshebaev hafði þó hægt um sig á blaðamannafundinum eftir leikinn í gær. „Þetta var hörkuleikur tveggja sterkra liða. Ég er ánægður með mitt lið þrátt fyrir að við duttum úr leik. Niklas Landin gerði gæfumuninn í dag,“ sagði Dujshebaev.

Samantekt úr leiknum má sjá hér.