Skuldaleiðréttingarfrumvörp kynnt í dag

Um 70 þúsund heimili í landinu ættu að geta notið góðs af skuldaleiðréttingaraðgerðum ríkisstjórnarinnar. Að auki ættu 30 þúsund heimili sem ekki eru með húsnæðisskuldir að geta fært sér í nyt nýtt ákvæði um séreignarsparnað.

Það felur í sér að sá sem ekki á fasteign getur notað allt að eina og hálfa milljón króna af séreignarsparnaði sínum skattfrjálst til kaupa á fasteign á næstu fimm árum.

Aðrir sem eiga séreignarsparnað geta notað hann til að greiða niður húsnæðislán sín um jafnháa upphæð, allt að eina og hálfa milljón, og án þess að greiða skatt af upphæðinni.

Frumvarp til lækkunar á höfuðstól verðtryggðra lána og frumvarp um séreignarsparnað voru kynnt og samþykkt í ríkisstjórn í gær. Þau verða kynnt í þingflokkum ríkisstjórnarflokkanna í dag og að því loknu lögð fyrir Alþingi.

Bjarni Benediktsson, efnahags- og fjármálaráðherra, sagði að viðamesta aðgerðin væri lækkun höfuðstóls húsnæðislánanna. Um 20 milljarðar króna eru eyrnamerktir á fjárlögum í það verkefni á þessu ári og áætlað er að upphæðin verði svipuð næstu þrjú ár þar á eftir, alls um 80 milljarðar króna.

Samkvæmt þeim tillögum sem kynntar hafa verið verður hámark á niðurfærslu skulda fjórar milljónir króna á heimili.

Um 70 milljarðar koma koma inn í kerfið með nýtingu séreignarlífeyrissparnaðar. Alls eru þetta því 150 milljarðar króna.

„Það felur í sér nýja hugsun og nýja nálgun að geta eignast sína fyrstu fasteign með því að nota til þess séreignarsparnaðinn,“ segir Bjarni Benediktsson.

Sigmundur Davíð Gunnlaugsson forsætisráðherra segir að það ákvæði að fólk geti nýtt séreignarsparnað til kaupa á fyrstu íbúð sé til að koma til móts við sem flesta.

„Auðvitað voru ekki allir með verðtryggð húsnæðislán,“ segir forsætisráðherra og bætir við þetta hafi fleiri kosti.

„Það stuðlar að aukinni sparifjáreign og gerir fólki betur kleift að eignast húsnæði,“ segir Sigmundur Davíð.

Bjarni segir að ekki sé hægt að segja til um endanlegt umfang aðgerðanna fyrr en allar umsóknir liggi fyrir.

Ef allt gengur að óskum verður opnað fyrir umsóknir um leiðréttingu á höfuðstól 15. maí og verður opið fyrir umsóknir í þrjá og hálfan mánuð eða til 1. september. Það kemur í hlut ríkisskattstjóra að halda utan um umsóknir en embættið mun opna sérstaka vefgátt þar sem fólk getur sótt um með rafrænum hætti.