Einar: Höfum ekkert heyrt frá IHF

HSÍ hefur hvorki heyrt frá Alþjóða handknattleikssambandinu (IHF) né Evrópska handknattleikssambandinu (EHF) en þetta staðfesti Einar Þorvarðarson, framkvæmdastjóri HSÍ við Vísi rétt í þessu.

Líkt og Vísir hefur fjallað um ákvað IHF að úthluta Þýskalandi sæti á Heimsmeistaramótinu í Katar eftir að hafa dæmt Ástrala úr keppni. Var það gert þrátt fyrir að EHF hefði þegar tilkynnt að Ísland væri fyrsta varaþjóð frá Evrópu kæmi til þess að sæti myndi losna. Kom það forráðamönnum EHF á óvart þegar blaðamaður Vísis heyrði í þeim á sínum tíma.

HSÍ skilaði greinagerð til IHF og EHf þar sem krafist var þess að málið yrði endurskoðað og að Ísland skyldi fá sæti Ástralíu á Heimsmeistaramótinu. Þrátt fyrir að HSÍ hefði krafist svara undir eins hefur ekkert heyrst frá IHF né EHF en formaður og varamaður HSÍ sátu fund með Hassan Moustafa, formanni Alþjóða handknattleikssambandsins 6. ágúst síðastliðinn.

Tveimur vikum síðan hefur ekkert heyrst en þetta staðfesti Einar rétt í þessu.

„Við höfum ekkert heyrt, við erum að ganga á eftir svörum en við höfum ekkert heyrt eftir fundinn sem við sátum fyrir tveimur vikum. Við erum að reyna að fá svör en það síðasta sem ég heyrði af forsetanum og framkvæmdarstjóranum var að þeir væru mættir á Ólympíuleika Æskunnar sem fara fram í Kína þessa dagana,“ sagði Einar.