Safnar gjaldeyri í stað þess að lækka stýrivexti

„Meginatriðið er að Seðlabankinn er að nýta gjaldeyrisinnflæði sumarsins til að styrkja gjaldeyrisforðann. Ákvörðunin gerir það að verkum að krónan verður veikari en ella og þá myndast ekki jafn mikið svigrúm til að hafa stýrivexti lægri vegna þess að það kemur niður á verðbólgunni,“ segir Ingólfur Bender, forstöðumaður Greiningar Íslandsbanka, um ákvörðun Seðlabankans um að hefja regluleg gjaldeyriskaup á ný.

Seðlabankinn ætlar að kaupa þrjár milljónir evra, rúmar 465 milljónir króna, á gjaldeyrismarkaði í hverri viku út september. *

Bankinn hætti reglulegum gjaldeyriskaupum í árslok 2012. Hann hefur þó frá maímánuði 2013 keypt 288 milljónir evra, að jafnvirði 45,1 milljarði króna, í því skyni að draga úr sveiflum á gengi krónunnar. Á þessu ári hefur bankinn keypt rúmar níu milljónir evra á viku að meðaltali, eða þrefalt meira en það sem stefnt er að með reglulegu kaupunum.

„Seðlabankinn er nú að setja gjaldeyriskaupin aftur í fastan farveg en bankinn vill augljóslega ekki sjá krónuna sterkari í bráð. Núna þegar verðbólgumarkmiðið er í höfn finnst mér eðlilegt að bankinn sé að leggja áherslu á að byggja upp gjaldeyrisvarasjóðinn. Hann þarf að vera tiltölulega mikið stærri þegar kemur að afnámi gjaldeyrishafta, ef hann á að nýtast til að verja stöðugleikann á gjaldeyrismarkaði,“ segir Ingólfur.

Már Guðmundsson seðlabankastjóri gerði grein fyrir ákvörðuninni á fundi bankans í gær þar sem ákvörðun peningastefnunefndar um að halda stýrivöxtum óbreyttum var kynnt. Már sagði svo geta farið að bankinn keypti einnig gjaldeyri í óreglulegum kaupum á næstu mánuðum.

„Markmiðið með þessum gjaldeyriskaupum er ekki það í sjálfu sér að hafa áhrif á gengi krónunnar, þó þetta hafi það kannski með einhverjum beinum eða óbeinum hætti. [...] Við höfum tvö verkefni. Annars vegar halda verðbólgunni við markmið og hins vegar viljum við yfir tíma safna gjaldeyri til þess að breyta okkar gjaldeyrisforða úr skuld við erlenda aðila yfir í skuld við innlenda aðila,“ sagði Már.

Hann sagði gjaldeyrisviðskipti Seðlabankans á síðastliðnum tólf mánuðum hafa stuðlað að auknum stöðugleika krónunnar.

Már sagði gjaldeyriskaupin ekki koma í stað vaxtahækkana, þegar Hafsteinn Hauksson, sérfræðingur hjá greiningardeild Arion Banka, spurði hvort svo gæti farið.

„Við viljum frekar nota svigrúmið til að safna gjaldeyri heldur en að lækka vexti. Það er líka í ljósi stöðunnar varðandi horfur um að viðskiptaafgangurinn sé að hverfa,“ sagði Már.