„Ég er trillukarl í Ólafsvík en ekki einhver símstöðvarstjóri“

„Ég er trillukarl í Ólafsvík en ekki einhver símstöðvastjóri,“ segir Stefán Pétursson sem hefur svarað símanum í allan dag vegna mistaka í fréttatilkynningu frá Svavari Halldórssyni um örþörungaverksmiðju á Reykjanesi. Þar var símanúmer Stefáns sett í stað símanúmers Skarphéðins Orra Björnssonar framkvæmdastjóra líftæknifyrirtæksins Algalífs.

Stefán hefur varla haft undan að svara símanum frá því að tilkynningin var send út í morgun. „Ég svara alltaf þegar hringt er, þannig er ég bara,“ útskýrir trillukarlinn og heldur áfram: „Ein kona frá Garðabæ hringdi í mig og við byrjuðum að spjalla um fráfarandi útvarpsstjóra,“ segir Stefán án þess að geta þess hvernig samtalið þróaðist í þá áttina. „Ég gat sagt henni að við Páll Magnússon vorum saman í barnaskóla og pabbar okkar voru vinir. Ég gat sagt konunni að Páll væri indælismaður,“ útskýrir Stefán.

Dagurinn átti að fara í að setja nýja vél í trilluna. „Ég er að setja vél í bátinn sem kostar sjö milljónir. Ég segi nú ekki að símsvörunin hafi eyðilagt daginn, en það eru komnar ansi margar hringingarnar. Fólk hefur spjallað mislengi við mig,“ segir Stefán og hlær.

Hann segir blaðamanni glaður frá fyrri tímum á sjónum og áhættuatriðum úti á rúmsjó þegar hann var þrettán ára gamall.

Svavar Halldórsson, sem sendi tilkynninguna frá sér í morgun, hafði heyrt í Stefáni þegar blaðamaður hafði samband. „Ég bað hann afsökunar á þessu. Svo kom í ljós að við erum báðir Vestmannaeyingar og hann þekkti pabba minn. Þetta er dásamlega lítill heimur,“ segir Svavar.