Óheimilt að krefja fólk um þvagsýni þegar sótt er um fjárhagsaðstoð

Í úrskurður Persónuverndar segir að það samræmist ekki lögum að krefja ákveðin umsækjanda um fjárhagsaðstoð um þvagsýni.

Þann 7. september 2013 barst Persónuvernd kvörtun frá aðila, vegna kröfu félagsþjónustu Fljótsdalshéraðs um þvagsýni frá aðilanum í tengslum við umsókn hans um fjárhagsaðstoð. Þar kemur m.a. fram að kvartað sé yfir kröfu félagsþjónustunnar um þvagsýni frá umsækjandanum í hvert skipti sem hann sækti um fjárhagsaðstoð.

Persónuvernd óskaði eftir nánari skýringum frá aðilanum um erindi hans. Hann kom frekari skýringum á framfæri munnlega með símtali við starfsmann Persónuverndar þann 30. september sl. Í símtalinu kom fram að hann teldi að vinnsla persónuupplýsinga um hann hefði átt sér stað þegar hann var beðinn um þvagsýni í tengslum við umsókn hans um fjárhagsaðstoð.

Þann 21. nóvember kom aðilinn á framfæri frekari skýringum á málinu nánar tiltekið að hann hefði verið beðinn um að skila þvagsýni til félagsþjónustu Fljótsdalshéraðs er hann sótti um fjárhagsaðstoð árið 2013. Hefði hann orðið við því í fyrsta skiptið en síðan þá hefði hann neitað að gefa þvagsýni og hefði af þeim sökum verið synjað um fjárhagsaðstoð frá þeim tíma.

Í úrskurðinum segir:Krafa félagsmálanefndar Fljótsdalshéraðs um afhendingu þvagsýnis frá kvartanda í tengslum við umsókn hans um fjárhagsaðstoð, var ekki í samræmi við lög nr. 77/2000, um persónuvernd og meðferð persónuupplýsinga.

Félagsmálastofnun Fljótsdalshéraðs hefur vísað til 8. gr. reglna um fjárhagsaðstoð hjá félagsþjónustu Fljótsdalshéraðs en þar segir:

„Heimilt er að synja umsækjendum um fjárhagsaðstoð séu þeir í neyslu áfengis- eða annarra vímuefna, en bjóða aðstoð til að fara í áfengis/vímuefnameðferð s.s. með greiðslu ferðakostnaðar og vasapeninga til einstaklinga sem eru að fara í áfengismeðferð og/eða aðra vímuefnameðferð og aðstoð vegna dvalargjalds á áfangaheimili.“