Falleg þrátt fyrir óhreinindi og hávaða

Delí er næststærsta borg Indlands með tæplega 18 milljónir íbúa og er stórborgarsvæði borgarinnar eitt það stærsta í heimi.

Sem Íslendingur eru það talsverð viðbrigði að heimsækja stað sem þennan því hér er allt margfallt stærra en við eigum að venjast og íbúarfjöldin mjög yfirþyrmandi.

Allar götur eru alltaf troðnar af fólki, bílum og svokölluðum Tuk-tuk farartækjum en það eru lítil yfirbyggð mótorþríhjól sem eru notuð sem leigubílar á Indlandi og víðar í Asíu. 

Delí varð höfuðborg landsins árið 1911 þegar Bretar ákváðu að höfuðborgin skyldi flutt frá Kalkútta og reistu þeir þá nýja borg fyrir sunnan Delí sem varð eftir það kölluð Nýja Delí. Þegar Indland hlaut sjálfstæði frá Bretum árið 1947 var Nýja Delí gerð að höfuðborg landsins og aðal stjórnsetri.

Borgin er mjög heillandi og falleg á sinn hátt þrátt fyrir að vera bæði skítug og hávaðasöm. Frá morgni til kvölds yfirgnæfa hróp, köll og bílflautur hugsanir manns en eftir tveggja daga dvöl er það farið að venjast furðu vel.

Hér er ódýrt að vera. Sígarettupakki kostar um 400 krónur íslenskar og fyrir væna máltíð á fínu veitingahúsi er algengt verð í kringum 1500 krónur. Allur matur sem við höfum fengið hér hefur verið hreint lostæti enda hefðbundin indversk matargerð með því allra besta sem lífið hefur upp á að bjóða. 

Tónlistin í klippunni hér að ofan er frá SOR Crew og kunnum við þeim bestu þakkir fyrir hana.



Vinirnir Frosti Logason og Sigurður Þorsteinsson fara í haust í sex vikna ferðalag um Asíu og Afríku. Þeir ætla að leyfa lesendum Vísis að fylgjast með ferðalaginu í máli, myndum og myndböndum. Félagarnir fara meðal annars í safarí í Suður-Afríku, fara á brimbrettanámskeið á Balí og læra að kafa í Taílandi. Verkefnið gengur undir heitinu AsíAfríka.