Allir bílar Benz munu fást í tvinnbílaútgáfu

Yfirmaður þróunardeildar Mercedes Benz, Thomas Weber, hefur látið hafa eftir sér að árið 2020 munu allar framleiðslugerðir þeirra bjóðast sem Plug-In-Hybrid bílar, þ.e. bílar sem hægt er að stinga í samband við heimilsrafmagn.

Þetta sagði hann við kynningu á nýjum Mercedes Benz S550 Plug-In-Hybrid bíl í síðustu viku. Brátt munu sjást slíkar útfærslur á C-Class, E-Class og GLK-Class bílunum þó ekki hafi fylgt hvenær sala muni hefjast á þeim.

Hinsvegar nefndi hann að árið 2017 muni Mercedes Benz bjóða alls 10 gerðir Plug-In-Hybrid bíla. Þessir bílar verða bæði knúnir bensín- og dísilvélum og hægt verður að bjóða slíka útfærslu með hvaða vélarstærð sem er. Ekki skiptir heldur neinu máli hvort þeir verða framhjóla-, afturhjóla- eða fjórhjóladrifnir, fólksbílar, jepplingar eða jeppar.