Hamilton og Rosberg fljótastir á föstudagsæfingum

Mercedes liðið eignaði sér æfingar dagsins fyrir ítalska kappaksturinn. Lewis Hamilton var fljótastur á þeirri fyrri en Nico Rosberg á þeirri seinni.

Á fyrri æfingunni varð strax ljóst að Mercedes vélin kann vel við sig á Monza brautinni. Brautin einkennist af löngum beinum köflum og miklum hraða.

Hamilton var hraðastur, annar varð Jenson Button á McLaren og Rosberg varð þriðji. Fjórði varð Fernando Alonso á Ferrari, hann var fljótastur allra sem ekki nota Mercedes vél rétt innan við sekúndu á eftir Hamilton. Kevin Magnussen á McLaren varð fimmti.

Þó nokkuð margir þróunarökumenn fengu tækifæri til að spreyta sig á æfingunni. Giedo van der Garde ók fyrir Sauber í stað Adrian Sutil. Daniel Juncadella ók fyrir Force India. Charles Pic tók sæti Romain Grosjean hjá Lotus í morgun. Roberto Mehri ók fyrir Caterham á meðan Kamui Kobayashi sat og horfði á.

Seinni æfingin var frekar jöfn. Ellefu hröðustu ökumennirnir voru allir á sömu sekúndunni. Gefur það vísbendingar um spennandi tímatöku á morgun.

Rosberg var hraðastur og Hamilton annar. Þar á eftir komu Kimi Raikkonen og Alonso á Ferrari. Valtteri Bottas á Williams varð fimmti og Button á McLaren sjötti.

Grosjean hefði haft gott af fyrri æfingunni því hann átti í talsverðu basli á seinni æfingu dagsins. Hann var iðinn við utanvegaakstur.

Tímatakan er í beinni útsendingu á Stöð 2 Sport og hefst klukkan 11:50 á morgun. Útsending frá keppninni á sunnudag hefst svo klukkan 11:30.