Lýsa yfir þriggja daga útgöngubanni vegna ebólu

Yfirvöld í Síerra Leóne hafa lýst því yfir að dagana 19. til 21. september megi íbúar landsins ekki yfirgefa heimili sín. Heilbrigðisstarfsmenn munu nota dagana til að einangra ebólusmitaða og reyna að koma í veg fyrir frekari útbreiðslu veirunnar.

Á vef BBC segir að farsóttin hafi nú dregið um 2.100 manns til dauða í Síerra Leóne, Líberíu, Gíneu og Nígeríu. Fleiri en tuttugu heilbrigðisstarfsmenn í Síerra Leóne hafi látist vegna Ebólu frá því í mars.

Embættismenn í landinu segja að um tuttugu þúsund varðmenn muni sjá um að fólk haldi sig heima til. Heilbrigðisráðherra landsins sagðist ekki eiga von á því að fólk myndi mótmæla útgöngubanninu.

„Ef fólk fylgir ekki banninu, er það að brjóta lögin. Ef það brýtur lögin er það að óhlýðnast forsetanum.“