Deilir afmælisdegi með afa sínum heitnum

„Það er mikill heiður fyrir mig að fá að tala fyrir hönd allra útskriftarnema á þessum stóra degi,“ segir Katrín Ósk Ásgeirsdóttir, ræðumaður Íslands árið 2014 og fráfarandi oddviti nemendafélags Flensborgarskólans. Hún útskrifast úr Flensborgarskólanum í dag og flytur ræðu útskriftarnema við athöfnina en það voru samnemendur hennar sem útskrifast í dag sem völdu hana hæfasta í verkið.

„Þetta er fyrst og fremst hátíðleg ræða að lokinni skólagöngu í Flensborg. Ræða til að þakka þeim sem áttu sinn þátt í því að leyfa okkur að standa þarna og útskrifast úr framhaldsskóla; skólastjórn og kennurum sem gerðu okkur kleift að vera þarna. Án þeirra stæðum við ekki þarna í dag. Ég ætla líka að horfa fram á við í ræðunni og tala um hvaða tækifæri taka við eftir útskrift,“ segir Katrín.

Katrín hefur verið meðlimur í ræðuliði Flensborgarskólans síðan hún var nýnemi árið 2010. Í ár sat hún einnig í stjórn Morfís, mælsku- og rökræðukeppni framhaldsskóla á Íslandi. Ræðulið Flensborgarskólans sigraði í Morfís-keppninni í ár, í fyrsta sinn í sögu skólans, og var Katrín valin ræðumaður Íslands. Hún er því öllu vön þegar kemur að ræðumennsku.

„Ég er ekkert stressuð fyrir útskriftarræðunni en auðvitað vil ég gera vel og mitt besta í þessari seinustu ræðu á sviði í Flensborg. Ég hef haldið þær ófáar þar og ég hlakka mikið til.“

Katrín útskrifast ekki aðeins á morgun heldur fagnar einnig tvítugsafmæli sínu. Hún deilir afmælisdeginum með föðurafa sínum sem hefði orðið sjötugur hefði hann lifað.

„Hann fékk mig í fimmtugsafmælisgjöf en hann lést árið 2004. Hann hefur alltaf verið mér ofarlega í huga á afmælisdeginum mínum og ég hef alltaf fagnað deginum með honum. Það er mjög gaman að eiga svona sérstakan dag með einhverjum þótt hann sé ekki til staðar,“ segir Katrín. Dagurinn er pakkaður hjá þessari atorkumiklu stúlku.

„Athöfnin í skólanum hefst klukkan 11 og lýkur um hádegi. Þá ætla ég að halda útskriftarveislu heima með fjölskyldu minni og nánustu vinum. Svo ætlum við nokkrir útskriftarnemar að halda útskriftarpartí í Reykjavík. Það er nóg að gera og þetta er mjög spennandi dagur.“

Þá er Katrín einnig frambjóðandi Sjálfstæðisflokksins í Hafnarfirði. Hún skipar níunda sæti á listanum og því möguleiki á að hún verði varabæjarfulltrúi á næsta kjörtímabili.

„Mér var boðið að sitja í níunda sæti á listanum og mér fannst það kjörið tækifæri fyrir mig til að komast inn í mál Hafnarfjarðarbæjar aðeins betur. Ég vil nýta þetta tækifæri og vera virk í félagsstarfinu sem á sér stað í flokknum. Mér finnst mikilvægt fyrir ungt fólk að það sitji einhver ungur á lista og mér finnst mjög gaman að vera fulltrúi unga fólksins,“ segir Katrín en það liggur beinast við að spyrja hvernig henni hafi tekist að útskrifast í ljósi þess öfluga félagsstarfs sem hún er hluti af.

„Ótrúlegt en satt náði ég öllu og er að fara að útskrifast. Ég þurfti að leggja mikið á mig á lokasprettinum og það var mikið af verkefnum og lærdómi sem ég þurfti að vinna upp til að ég gæti útskrifast. En um leið og ég sá von spýtti ég í lófana. Þetta hófst á endanum og er ótrúlega gaman. Ég þakka líka foreldrum mínum ótrúlega þolinmæði og stuðning á meðan á þessu stóð. Þetta hefði ég aldrei getað gert án þeirra og er ég þeim óendanlega þakklát.“

En hvað tekur við hjá Katrínu?

„Eftir útskrift ætla ég út á vinnumarkaðinn í eitt ár. Mig langar einnig að ferðast aðeins í byrjun næsta árs með vinkonu minni. Mig hefur lengi dreymt um að fara í lögfræði við Háskóla Íslands og ég stefni þangað haustið 2015. Ég hef einnig mikinn áhuga á að starfa í fjölmiðlum þannig að við sjáum hvað gerist í framtíðinni.“