Sáralítil mengun í verksmiðju Silicor að mati efnaverkfræðings

Efnaverkfræðingur og ráðgjafi hjá Silicor Materials, sem áformar að reisa eina stærstu sólarkísilverksmiðju í heimi á Grundartanga, vísar á bug að mikil mengun muni skapast vegna starfsemi verksmiðjunnar. Gera þurfi þá kröfu til allra að farið sé með rétt mál.

Haraldur Sigurðsson eldfjallafræðingur skrifaði grein fyrr í mánuðinum þar sem hann varaði við mengun af fyrirhugaðri starfsemi bandaríska fyrirtækisins Silicor Materials sem áformar að reisa verksmiðju til að framleiða sólarsellur. Í grein Haraldar kemur fram að framleiðsla á sólarsellum sé sóðaleg og mengandi. Talsverð losun verði á eiturefninu sílikon tetraklórið. Greinin hefur fengið talsverða umfjöllun í fjölmiðlum og á samfélagsmiðlum.

Guðjón Jónsson, efnaverkfræðingur hjá VSÓ Ráðgjöf sem unnið hefur fyrir Silicor hér á landi, segir að að um misskilning sé að ræða.

„Það er verið að rugla saman tveimur ferlum. Ferilinn sem Silicor ætlar að nota hefur ekkert með þann feril að gera sem Haraldur er að tala um, þessi Siemens-ferill,“ segir Guðjón.

„Það sem Silicor-ferilinn gengur út á er að það er í rauninni verið að þvo kísil og hreinsa hann með því að þvo hann í áli. Þetta er einstakt og er alveg nýr ferill. Gamli Siemens-ferilinn er með allt önnur efni, allt aðrar aðferðir og mengunarefni en koma frá þessum ferli.“

Umhverfismat þótti óþarft

Haraldur sagðist í samtali við fréttastofu í dag standa fyllilega að baki greininni og hún væri unnin út frá þeim gögnum sem hann hefði um starfsemi fyrirtækisins. Skipulagsstofnun þótti ekki nauðsynlegt að gera umhverfismat á framkvæmdinni þar sem hreinsun kísilmálms til framleiðslu á sólarkísil sé ekki líkleg til að hafa í för með sé umtalsverð umhverfisáhirf.

Hversu mikil mengun mun hljótast af starfsemi Silocor á Grundartanga?

„Hún er alveg sáralítil,“ segir Guðjón. „Við höfum reiknað út að þetta sé rúmlega 63 tonn af ryki sem að fylgir ferlinu. Losun gróðurhúsalofttegunda er undir þúsund tonnum sem er afskaplega lítið frá stóriðju. Þetta er sáralítil mengun í þessu iðnaðarumhverfi sem þarna er.“

Guðjón biður fólk um að vanda sig í umræðunni. „Öll svona umræða er afskaplega óþægileg. Við verðum að gera þá kröfu til allra að þeir fari með rétt mál ef þeir eru að ræða þessi mál. Fólk fer af stað og heldur að við séum að skrökva og að þarna sé eitthvað annað í gangi en það sem er í raun og veru. Öll slík umræða getur skemmt slíka ferla og er ekki neinum til góðs.“