Viðskipti innlent

Stjórn Silicor skrifar undir viljayfirlýsingu vegna lóðar á Grundartanga

Haraldur Guðmundsson skrifar
Verksmiðja Silicor Materials yrði samkvæmt áætlunum um 93.000 fermetrar að stærð og framkvæmdasvæðið alls um 223.000 fermetrar.
Verksmiðja Silicor Materials yrði samkvæmt áætlunum um 93.000 fermetrar að stærð og framkvæmdasvæðið alls um 223.000 fermetrar. Vísir/Pjetur
Forsvarsmenn bandaríska fyrirtækisins Silicor Materials ætla samkvæmt heimildum Markaðarins að undirrita viljayfirlýsingu í dag við Faxaflóahafnir sem kveður á um vilyrði fyrir úthlutun lóðar á Grundartanga og framkvæmdum við innviði á svæðinu.

Yfirlýsingin þýðir að stjórn fyrirtækisins, sem er nú stödd hér á landi, hefur tekið endanlega ákvörðun um að stefna að byggingu 77 milljarða króna sólarkísilverksmiðju á Íslandi. Sádi-Arabía og Kanada voru áður einnig inni í myndinni. Stjórnendur sveitarfélaga á Vesturlandi, þar á meðal Hvalfjarðarsveitar, Akraneskaupstaðar og Borgarbyggðar, verða að öllum líkindum viðstaddir undirritunina á Katanesi við Grundartanga.

Heimildir blaðsins herma að viðræðum Silicor við Orku náttúrunnar, hlutafélag í eigu Orkuveitu Reykjavíkur, og Landsvirkjun um raforkukaup miði vel. Einnig er fjárfestingarsamningur, eða svokallaður ívilnanasamningur, ríkisstjórnarinnar við fyrirtækið sagður langt kominn.

Sveitarstjórn Hvalfjarðarsveitar barst fyrr í vor erindi frá nefnd ríkisins um ívilnanir vegna nýfjárfestinga. Þar kemur fram að Silicor hafi óskað eftir ívilnunum vegna fyrirhugaðra framkvæmda. Ívilnanir fela í sér afslætti af ýmsum opinberum gjöldum og sköttum. Hvalfjarðarsveit hefur tekið vel í veitingu þeirra og lýst yfir formlegum stuðningi við byggingu verksmiðjunnar, eins og komið hefur fram í Fréttablaðinu.

Áætlanir Silicor Materials gera ráð fyrir verksmiðju sem gæti framleitt um nítján þúsund tonn af sólarkísil á ári og skapað um fjögur hundruð störf. Kísillinn yrði notaður í framleiðslu á sólarrafhlöðum. Fyrirtækið vill hefja framkvæmdir næsta haust og gerir ráð fyrir að framleiðsla hefjist haustið 2017 eða vorið 2018. Verkefni tengd Silicor eru einnig í skoðun í Helguvík.






Fleiri fréttir

Sjá meira


×