Vilja lagafrumvarp um Teigsskógarveg

Bæjarráð Vesturbyggðar segir að samfélagið á sunnanverðum Vestfjörðum þoli ekki frekari tafir á vegaframkvæmdum. Þetta kemur fram í bókun bæjarráðs vegna þeirrar stöðu sem upp er komin vegna veglagningar í Gufudalssveit.

Bæjarráð Vesturbyggðar óskar eftir fundi með vegamálastjóra vegna málsins og skorar jafnframt á forseta Alþingis, Einar K. Guðfinnsson, að hann leggi fram að nýju lagafrumvarp um að Vestfjarðavegur skuli liggja um Teigsskóg.

Í greinargerð frumvarpsins, sem þeir Ásbjörn Óttarsson og Gunnar Bragi Sveinsson fluttu með Einari á sínum tíma, sagði meðal annars:

„Brýnasta verkefnið í vegamálum á Íslandi, vegagerð um Vestfjarðaveg, er í fullkomnu uppnámi og hefur svo verið um árabil.“ Og ennfremur:

„Það er algjörlega óviðunandi að vegagerð á þessum slóðum geti ekki haldið áfram og það jafnvel þó að fjármagn sé til staðar. Markmið þess frumvarps sem er hér lagt fram er að rjúfa þennan grafalvarlega vítahring og heimila með lögum vegagerð á svæðinu út með Þorskafirði, með þverun Gufufjarðar og Djúpafjarðar, samkvæmt svokallaðri tillögu B frá Vegagerðinni, með þeim skilyrðum sem þáverandi umhverfisráðherra, Jónína Bjartmarz, setti í úrskurði sínum frá 6. janúar 2007. 

Er það skoðun flutningsmanna að slíkur vegur þjóni hagsmunum vegfarenda best, tryggi heilsárssamgöngur Vestur-Barðastrandarsýslu með tengingu við meginþjóðvegakerfi landsins og sé í sátt við umhverfið.“