Væri starfsmaður á kassa í búð

„Við áfrýjum klárlega. Við teljum að dómurinn sé í villu með staðreyndir um stöðu og hlutverk verðbréfamiðlara,“ segir Karl Georg Sigurbjörnsson, lögmaður Elmars Svavarssonar.

Elmar var í Héraðsdómi Reykjavíkurdæmdur í fimm ára fangelsi ásamt þeim Birki Kristinssyni og Jóhannesi Baldurssyni. Allir störfuðu þeir saman hjá Glitni en Elmar starfaði sem verðbréfamiðlari. Lögmenn allra fjögurra hafa nú staðfest við Vísi að dómnum verði áfrýjað.

„Hann er í engri stöðu til að taka ákvörðun um eitt eða neitt,“ segir Karl Georg og segir verðbréfamiðlara hér á landi þurfa að hafa áhyggjur af stöðu sinni eftir niðurstöðu dómsins. Elmar sé lágsettur starfsmaður en sakfelldur með framkvæmdastjórum.

„Ég myndi ráðleggja verðbréfamiðlara að leita sér að öðru starfi.“

Væri starfsmaður á kassa í búð

„Ef hann væri að vinna í búð væri hann bara starfsmaður á kassa,“ segir Karl Georg. Miðlari taki aðeins vöruna og flytji á milli aðila. Ekki sé hægt að gera hann ábyrgan fyrir láninu eins og dómurinn í geri. Honum sé gefið annað hlutverk innan bankans en hann hafi.

Karl Georg segir dóminn ekki hafa tekið til greina skýringar lögmanna dæmdu að einu né neinu leyti. Ákærunni hafi í raun bara verið snúið í dóm að hans mati.

„Birkir Kristinsson er hlutdeildarmaður í brotinu og hann fær sömu refsingu,“ segir Karl Georg ósáttur. Augljóst mál sé að dómnum verði áfrýjað til Hæstaréttar.

Dóminn í heild sinni má lesa hér.