Áfrýjun á leiðinni til ríkissaksóknara

Lögmaður Birkis Kristinssonar segir að skjólstæðingur sinn hafi ekki átt von á öðru en að málinu yrði vísað frá eða hann yrði sýknaður. Birkir var einn þriggja sem dæmdur var í fimm ára fangelsi í Héraðsdómi Reykjavíkur í dag fyrir umboðssvik, markaðsmisnotkun og brot á lögum um ársreikninga í tengslum við 3,8 milljarða lánveitingu Glitnis til félagsins BK-44 í nóvember 2007. Félagið var í eigu Birkis.

Auk Birkis, sem gegndi stöðu viðskiptastjóra hjá einkabankaþjónustu Glitnis, voru Elmar Svavarsson, verðbréfamiðlari, og Jóhannes Baldursson, framkvæmdastjóri markaðsviðskipta, dæmdir í fimm ára fangelsi. Magnús Arnar Arngrímsson, framkvæmdastjóri fyrirtækjasviðs, var dæmdur í fjögurra ára fangelsi.

„Dómurinn kom verulega á óvart. Birkir hélt að málinu yrði annaðhvort vísað frá eða hann sýknaður,“ segir Ólafur Eiríksson, lögmaður Birkis, í samtali við Vísi. Ólafur hafði nýlokið við að lesa forsendur og niðurstöður dómsins er fréttamaður náði tali af honum. Framhaldið er ljóst af þeirra hálfu.

„Áfrýjun er á leiðinni inn til ríkissaksóknara,“ segir Ólafur. Annað sé ekki hægt að hans sögn. Ólafur segir Birki telja að niðurstaðan í dag sé byggð á röngum staðreyndum.

Ekki í samræmi við málsmeðferð í héraði

„Dómurinn kom mér algjörlega í opna skjöldu,“ segir Helgi Birgisson, lögmaður Magnúsar Arnars. Hann segir allir líkur á því að dómnum verði áfrýjað.

„Miðað við aðkomu míns manns að þessu máli átti maður ekki von á öðru en hann yrði sýknaður,“ segir Helgi. Magnús Arnar eigi einn tölvupóst í gögnum sérstaks saksóknara sem telji um þrjú þúsund blaðsíður.

„Niðurstaðan kom mér mjög á óvart og er ekki í samræmi við það sem fram kom við málsmeðferð í héraði.“

Reimar Pétursson, lögmaður Jóhannesar, staðfesti við fréttasofu að dómi Jóhannesar yrði áfrýjað til Hæstaréttar. Það gerði Karl Georg Björnsson, lögmaður Elmars einnig.

„Ég myndi ráðleggja verðbréfamiðlara að leita sér að öðru starfi,“ sagði Karl Georg í viðtali við Vísi sem lesa má hér.

Dóminn í heild sinni má lesa hér.