Jón Margeir setti nýtt Íslandsmet

Sundmaðurinn Jón Margeir Sverrisson úr Fjölni er nýkominn heim frá Danmörku þar sem hann var við æfingabúðir og keppni. Um mánaðarmótin tók hann þátt í Danish International Swim Cup þar sem Jón setti nýtt Íslandsmet í 400m fjórsundi.

Jón stórbætti þar eigið met í 400m. fjórsundi í 25 metra laug þegar hann kom í bakkann á 4:51,03 mín. Gamla metið var 4:55,63 mín. og hafði staðið frá því í mars á síðasta ári.

Jón á nú Íslandsmet í öllum greinum þroskahamlaðra karla í 25m. laug nema í 50 metra, 100 metra og 200 metra baksundi en þau á Asparmaðurinn Gunnar Örn Ólafsson og standa þau öll síðan 2004.

 

Erlendum verkefnum Jóns er lokið í bili en hann heldur nú inn í langt og strangt sumar í undirbúningi sínum fyrir Evrópumeistaramótið í sundi sem fram fer í Hollandi dagana 4.-10. ágúst næstkomandi.