Fyrsta skóflustungan tekin í dag á Kárhóli

Fyrsta skóflustungan að norðurljósarannsóknarstöð á Kárhóli í Reykjadal var tekin í dag. Uppbygging stöðvarinnar er liður í samkomulagi milli Rannsóknarmiðstöðvar Íslands og Heimskautastofnunar Kína. Rúmlega 700 fermetra bygging verður reist sem hýsa mun rannsóknartæki og vinnuaðstöðu fyrir vísindamenn.

Rannsóknir hófust þó í fyrra, en starfsemi stöðvarinnar mun útvíkka þær mælingar sem þegar eru gerðar hér að landi. Meðal annars getur munu Veðurstofa Íslands, Raunvísindastofnun Háskóla Íslands, Háskólinn á Akureyri, Norðurslóðanet Íslands og Heimskautastofnun geta tekið þátt í rannsóknum stöðvarinnar.

Atvinnuþróunarfélag Þingeyinga og Atvinnuþróunarfélag Eyjafjarðar, Atvinnuefling Þingeyjarsveitar, Kjarni ehf. og Artic Portal, stofnuðu í fyrra sjálfseignarstofnunina, Aurora Observatory. Hún mun annast uppbyggingu og rekstur allrar aðstöðu á Kárhóli.

Í tilkynningu frá Utanríkisráðuneytinu segir Gunnar Bragi Sveinsson, utanríkisráðherra, að alþjóðlegt samstarf íslenskra mennta- og vísindastofnana mikilvægan þátt í stefnu stjórnvalda um þekkingaruppbyggingu og vísindasamstarf í málefnum norðurslóða.

Hann segir stjórnvöld leggja mikla áherslu á fjölþjóðlegt samstarf ríkja í málefnum svæðisins. Einkum á vettvangi Norðurskautsráðsins en einnig tvíhliða samstarf meðal annars við Kína, sem hefur eflst eftir undirritun samnings um vísindasamstarf í málefnum norðurslóða árið 2012.

Í framhaldi af skóflustungu að stöðinni hefst tveggja daga málþing á Akureyri, þar sem vísinda- og fræðimenn frá Norðurlöndunum og Kína, auk fulltrúa ríkja Norðurskautsráðsins munu fjalla um málefni Norðurslóða, m.a. alþjóðasamvinnu, efnahagslíf og alþjóðavæðingu.