Stjórnendur Arion banka segja fulls jafnræðis gætt í hlutafjárútboðum

Stjórnendur Arion banka vísa því á bug að bankinn hafi mismunað tilboðsgjöfum í hlutafjárútboði HB Granda.

Forstjóri Kauphallarinnar sagði í síðustu viku að það væri „grafalvarlegt“ og „óvandaðir viðskiptahættir“ að menn hafi ekki staðið við tilboð í 5,7 prósent heildarhlutafjár í HB Granda í útboðinu, en Arion banki annaðist útboðið fyrir hönd eigenda bréfanna.

Stjórnendur Arion banka telja að umfjöllun fréttastofu Stöðvar 2 og Vísis um hlutafjárútboð HB Granda hafi verið gildishlaðin og ósanngjörn fyrir bankann. 

Í frétt okkar í síðustu viku kom fram að tilboðsgjafar í 5,7 prósent hlutafjár, sem gerðu tilboð í bréf í HB Granda  á genginu 27,7 hefðu fallið frá áskriftum sínum og ekki greitt fyrir bréfin. Það var þetta sem forstjóri Kauphallarinnar taldi svo alvarlegt. 

Viðskiptavinir Arion banka sem tóku þátt í hlutafjárútboðinu töldu þetta fela í sér mismunun. Þá sendi viðskiptavinur, sem tók þátt í útboðinu og greiddi fyrir sín bréf, rökstudda kvörtun til Fjármálaeftirlitsins og taldi að þetta gæti hugsanlega fallið undir markaðsmisnotkun hjá þeim sem sendu inn tilboð sem ekki var staðið við.

Að senda inn falskt kauptilboð er eitt af því sem fellur undir markaðsmisnotkun samkvæmt 117. gr. laga um verðbréfaviðskipti.  

Af þessu tilefni sagði Halldór Bjarkar Lúðvígsson, framkvæmdastjóri fjárfestingarbankasviðs Arion banka, að í raun gætu allir sent inn tilboð og fallið frá áskriftum. Þannig sætu tilboðsgjafar í raun við sama borð.

Segja leikreglur hafa verið skýrar frá upphafi

„Allir þátttakendur sátu við sama borð og jafnræðis var gætt í hvívetna. Leikreglur voru skýrar frá upphafi og öllum fjárfestum aðgengilegar. Allir sem skrifuðu sig fyrir hlut og fengu áskriftir sínar samþykktar fengu greiðsluseðla. Við lok eindaga voru allir ógreiddir greiðsluseðlar felldir niður. Þar skipti engu hvort fjárhæðirnar voru háar eða lágar. Strax í kjölfarið voru hlutabréfin tekin til viðskipta í Kauphöll. Eftir eindagann og eftir að hlutabréfin voru tekin til viðskipta í Kauphöllinni var því ekki hægt að greiða ógreidda áskrift,“ segir Haraldur Guðni Eiðsson, talsmaður Arion banka. Haraldur Guðni segir jafnframt að Arion banki telji það alvarlegt að einstakir tilboðsgjafar hafi ekki staðið við innsend tilboð í hlutabréfaútboði HB Granda. 

Nokkur umræða hefur verið um útboð HB Granda en það þykir ekki hafa heppnast jafn vel og önnur slík hjá félögum sem skráð hafa verið í Kauphöll eftir hrun. Þannig telja sérfræðingar á fjármálamarkaði sem fréttastofa hefur rætt við að bréfin í HB Granda hafi verið verðlögð of hátt við skráningu.