Handboltalið Benidorm komið í úrvalsdeildina

Benidorm er þekkt fyrir strendur og hressandi næturlíf en það eru færri sem vita að það er stundaður handbolti þar.

Það sem meira er þá verður stundaður úrvalsdeildarhandbolti á Benidorm næsta vetur því félag liðsins er búið að tryggja sér sæti í úrvalsdeildinni.

Í undanúrslitum um laust sæti í deildinni lagði BM Benidorm lið Zarauts, 26-22. Úrslitaleikurinn gegn Madridarliðinu Alcobendas var aftur á móti æsispennandi.

Framlengja þurfti leikinn en Benidorm vann eins marks sigur, 26-25, eftir framlengingu.

Það var reyndar varalið Barcelona sem vann B-deildina en liðið fær ekki að fara upp í úrvalsdeild þar sem Barcelona er fyrir með aðallið sitt þar.