Guif fékk á sig sigurmark einni sekúndu fyrir leikslok

Guif frá Eskilstuna tapaði fyrir Alingsås, 21-20, í þriðja leik liðanna í undanúrslitum sænsku úrvalsdeildarinnar í handbolta í kvöld í ævintýrlega spennandi leik.

Guif komst yfir, 20-19, þegar fjórar mínútur voru eftir af leiknum en tókst ekki að skora fleiri mörk og missti leikinn niður í tap.

Gestirnir í Alingsås jöfnuðu leikinn, 20-20, þegar ein og hálf mínúta var eftir með marki úr vítakasti og skoruðu svo sigurmarkið þegar ein sekúnda var eftir af leiknum, 21-20.

Gríðarlega svekkjandi tap fyrir strákana hans KristjánsAndréssonar sem þurfa nú sigur á útivelli til að jafna einvígið og tryggja sér oddaleik á heimavelli. Það lið sem fyrr vinnur þrjá leiki fer í úrslitaleikinn.

Aron Rafn Eðvarðsson stóð vaktina í marki heimamanna og varði þrettán skot og var með 45 prósent hlutfallsmarkvörslu en Heimir Óli Heimisson komst ekki á blað á línunni.